2024 ഡിസംബർ 16, തിങ്കളാഴ്‌ച

 🌹 തിരിച്ചറിവ്🌹

ഒരിക്കൽ കുറച്ചു വിനോദ യാത്രക്കാർ വഴിയോര കാഴ്ച്ച ആസ്വദിച്ചുകൊണ്ടിരിക്കുമ്പോളാണ് കുറച്ചു ആനക്കൂട്ടങ്ങളെയും പാപ്പനെയും ശ്രദ്ധയിൽപ്പെട്ടത് വളരെ മനോഹരമായ ഒരു കാഴ്ച്ച ആയിരുന്നു അത്. അപ്പോളാണ് അവർ ആ കാര്യം ശ്രദ്ധിച്ചത് എല്ലാ ആനകളെയും ചങ്ങല ഉപയോഗിച്ചില്ല, മറിച്ച് ഒരു ചെറിയ കയർ കൊണ്ടാണ് ബന്ധിപ്പിച്ചു വച്ചിരിക്കുന്നത്. ആനകൾക്കു ഒരൊറ്റ വലിക്കു കയർ പൊട്ടിച്ചു പോകാവുന്നതേ ഉള്ളൂ.പക്ഷെ ഒരാന പോലും അതു പൊട്ടിച്ചു പോകാൻ ശ്രമിക്കുന്നുമില്ല. ഇതു കണ്ടതും അവർ ആ പാപ്പനോട് കാര്യം തിരക്കി. പാപ്പാൻ പറഞ്ഞു വളരെ കുഞ്ഞിലേ തന്നെ ഞാൻ ഇവരെ ഈ കയർ കൊണ്ടാണ് ബന്ധിപ്പിച്ചിരുന്നത്. അന്ന് അവർ കുറെ ശ്രമിച്ചപ്പോളും പരാജയപ്പെട്ടു. പിന്നീട് അവർക്കു മനസ്സിലായി തങ്ങൾക്കു അതു ഒരിക്കലും പൊട്ടിക്കാൻ സാധിക്കില്ലെന്ന്. പിന്നീട് അവർ അതിനു ശ്രമിച്ചിട്ടേ ഇല്ല.. ഇതു തന്നെയാണ് നമ്മൾ മനുഷ്യർക്കിടയിലും സംഭവിക്കുന്നത്. നമ്മൾ ലക്ഷ്യത്തിലെത്താൻ മുൻപ് എപ്പോഴോ ശ്രമിച്ചപ്പോൾ പരാജയപ്പെട്ടിട്ടുണ്ടാകാം.അന്ന് ആ ശ്രമം ഉപേക്ഷിച്ചു വന്നവരായിരിക്കാം നമ്മളിൽ പലരും... നമ്മൾ ലക്ഷ്യം നേടാൻ ശ്രമിച്ചുകൊണ്ടേയിരിക്കുക. ശ്രമ പരാജയങ്ങൾ ഒരുപാട് ഉണ്ടായിട്ടുണ്ടാകും അതൊന്നും കണക്കിലെടുക്കാതെ മുന്നോട്ടു തന്നെ പോകുക ഒരിക്കൽ നിങ്ങൾ ലക്ഷ്യ സ്ഥാനത്ത് എത്തിയിരിക്കും.

                    എന്ന് 

                 തൂലിക ✍️✍️✍️

2024 ഡിസംബർ 15, ഞായറാഴ്‌ച

 🌹*ഗുരുകുലം*🌹

ഒരു ആശ്രമത്തിൽ ഒരുകൂട്ടം ശിഷ്യന്മാർ ഗുരുവിന്റെ ഗുരുകുല പാഠങ്ങൾ സ്വായത്തമാക്കുന്ന വേളയിൽ ഒരു ശിഷ്യൻ എഴുന്നേറ്റ് നിന്ന് തന്റെ ഗുരുവിനോട് ഇപ്രകാരം പറഞ്ഞു. എനിക്ക് അങ്ങയോടു ഒരു കാര്യം പങ്കുവക്കാനുണ്ട്. പഠനവേളയിൽ മറ്റു ശിഷ്യന്മാർക്ക് ബുദ്ധിമുട്ട് ഉണ്ടാക്കാതെ സന്ധ്യ സമയം എല്ലാ ശിഷ്യന്മാരും വിശ്രമിക്കുമ്പോൾ ഗുരു തന്റെ ശിഷ്യനെ അടുത്തേക്ക് വിളിച്ചു കാര്യം തിരക്കി. ഉണ്ണി എന്താണ് എന്നോട് പറയാനുള്ളത്. ഗുരു.... ഞാൻ ഇവിടെ നിന്നും പഠനം മതിയാക്കി പോകാൻ ആഗ്രഹിക്കുന്നു. എനിക്ക് പഠനത്തിലേക്കു ശ്രദ്ധ കേന്ദ്രീകരിക്കാൻ പറ്റുന്നില്ല. എന്റെ ചുറ്റുമുള്ളവർ പരദൂഷണം പറഞ്ഞും നുണകൾ പറഞ്ഞും കൊണ്ടേ ഇരിക്കുന്നു എന്റെ പഠനത്തിന് തടസ്സം വരുത്തുന്നു. എനിക്ക് ശാന്തിയും സമാധാനവും ഉള്ള ഒരിടം ആണ് ആവശ്യം.

"ഇത്രയും കേട്ട ശേഷം ഗുരു പറഞ്ഞു. ഉണ്ണി... ഞാൻ അനുവാദം നൽകാം പക്ഷെ പോകുന്നതിനു മുൻപ് തനിക്ക് ഒരു കാര്യം ചെയിതു തരുമോ? ഒരു സ്പൂൺ വെള്ളമായി ഈ ആശ്രമത്തിനു ചുറ്റും വലം വച്ചു എന്റെ അടുത്തെത്തണം. ഒരു നിബന്ധനയുണ്ട്. ഒരു തുള്ളി വെള്ളം പോലും താഴെ കളയാൻ പാടില്ല.

ഇതു കേട്ടതും ശിഷ്യൻ "അതിനെന്താ വളരെ പെട്ടന്നു തന്നെ ഞാൻ അങ്ങയുടെ അടുത്ത് ഒരു സ്പൂൺ വെള്ളം ആയി എത്തുന്നതായിരിക്കും. അങ്ങനെ ശിഷ്യൻ വളരെ ജാഗ്രതയോടെയും പതുക്കെയും നടന്നു ഇരുട്ടും മുൻപ് ഒരു തുള്ളി വെള്ളം പോലും കളയാതെ തന്റെ ഗുരുവിന്റെ അടുത്തെത്തി പറഞ്ഞു. അല്ലയോ ഗുരു ഞാൻ എന്റെ ധൗത്യം വളരെ ഭംഗിയോടെയും കൃത്യമായും നിറവേറ്റി. എന്നെ പോകാൻ അനുവദിച്ചാലും. ശിഷ്യാ....താങ്കൾ നിഷ്പ്രയാസം ഈ ധൗത്യം ഇത്ര ഭംഗിയായി എങ്ങനെ നിറവേറ്റി?

*ശിഷ്യൻ* ---ഗുരു ഞാൻ മറ്റൊന്നിനെ കുറിച്ചും ചിന്തിച്ചില്ല എന്റെ ലക്ഷ്യം തിരിച്ചു അങ്ങയുടെ അടുത്ത് ഒരു തുള്ളി വെള്ളം പോലും കളയാതെ തിരിച്ചെത്തുക എന്നു മാത്രം ആയിരുന്നു.

*ഗുരു* ---തീർച്ചയായും ഉണ്ണി ചെയ്തത് തന്നെയാണ് ലക്ഷ്യ സ്ഥാനത്ത് എത്താൻ സാധിച്ചത്. അങ്ങനെ ആണേൽ ഞാൻ ഒന്നു ചോദിക്കട്ടെ. ഗുരുകുല പാഠം സ്വയാത്തമാക്കാൻ എത്തിയ ഉണ്ണിയുടെ ലക്ഷ്യം അതു മാത്രമാണ്. അതിനാൽ ചുറ്റും നടക്കുന്ന കാര്യങ്ങൾ ഉണ്ണിയെ ബാധിക്കേണ്ടതില്ലല്ലോ?ഗുരു പറഞ്ഞ വാക്കുകൾ ശിഷ്യന്റെ കണ്ണുകൾ തുറപ്പിച്ചു..

*ഗുണപാഠം* ---നമ്മൾ ഏതൊരു കാര്യം നിർവഹിക്കാൻ ഇറങ്ങി തിരിച്ചാലും നിരവധി തടസ്സങ്ങൾ നമ്മുടെ വഴി മദ്ധ്യേ ഉണ്ടാകാം അവയൊന്നും തന്നെ ബാധിക്കാത്ത രീതിയിൽ വളരെ ശക്തിയോടെ മുന്നോട്ട് നീങ്ങുക. തീർച്ചയായും നിങ്ങൾ ലക്ഷ്യ സ്ഥാനത്തു എത്തിച്ചേരും.

                       എന്ന് 

                       തൂലിക✍️✍️✍️

2024 ഡിസംബർ 13, വെള്ളിയാഴ്‌ച

 📝📃✍️✍️✍️✍️✍️

ഒരിക്കൽ ഒരു അച്ഛനും മകനും ട്രെയിനിൽ യാത്ര ചെയ്യുകയായിരുന്നു. ഒരു 22,24, പ്രായം തോന്നിക്കുന്ന മകൻ ജനലിലൂടെ പുറത്തെ കാഴ്ച്ചകൾ ആദ്ഭുതത്തോടെ നോക്കി നിൽക്കുന്നു. എന്തോ അവന്റെ സംസാരം, ശരീര പ്രകൃതി എല്ലാം കണ്ടിട്ടാണെന്ന് തോന്നുന്നു. മറ്റു യാത്രക്കാർ അവനെ തന്നെ ഉറ്റു നോക്കുന്നു.


*അച്ഛാ ദേ... കണ്ടോ മരങ്ങൾ ഓടിപ്പോകുന്നു. ദേ...... സൂര്യൻ...... ദേ...... വിമാനം......*


എന്ന് തുടങ്ങി കുഞ്ഞു കുട്ടികൾ സംസാരിക്കുന്നതു പോലെ അവൻ പറഞ്ഞു കൊണ്ടേ ഇരിക്കുന്നു. എന്നാൽ എല്ലാരും ശ്രദ്ധിക്കുന്നത് വക വെക്കാതെ ആ പിതാവ് അവനു എല്ലാം പറഞ്ഞു മനസ്സിലാക്കി കൊണ്ടിരിക്കുന്നു ഒരിക്കൽ പോലും അവനെ തടയാതെ.

എന്തോ യാത്രക്കാർക്കു അത് ഒരു ആരോസകരമായി തോന്നി. ഈ കുട്ടിയെന്താ ഇങ്ങനെ എന്ന് അവർ പരസ്പരം പിറുപിറുക്കാൻ തുടങ്ങി.

ഇടയ്ക്കു എപ്പോളോ ഒരാൾ ആ പിതാവിനോട് ചോദിച്ചു.

"മകൻ ആദ്യമായിട്ടാണോ ട്രെയിൻ കയറുന്നത്." 


പിതാവ് ചെറു പുഞ്ചിരിയോടെ പറഞ്ഞു.

അല്ല ഇന്നാണ് അവൻ ഇതെല്ലാം ആദ്യമായി കാണുന്നത്. ജന്മനാൽ കാഴ്ച നഷ്ടപ്പെട്ടിരുന്ന മകന് ഓപ്പറേഷൻ കഴിഞ്ഞു ദൈവ കൃപയാൽ കാഴ്ച്ച ലഭിച്ച് വീട്ടിലോട്ട് മടങ്ങുന്ന വഴിയാണ്...


ഈ മറുപടി എല്ലാവരെയും ഈറൻ അണിയിച്ചു...

ഈ ഒരു കഥയുടെ സാരം നമ്മൾ ഇന്നു അറിഞ്ഞിരിക്കേണ്ടതാണ്. ഇന്നു പലർക്കും ഇല്ലാതെ പോയതും അതു തന്നെ. ഒരിക്കലും നമ്മൾ ഒരാളെ പ്രത്യക്ഷത്തിൽ വിലയിരുത്താൻ പാടില്ല.അവരെ അടുത്തറിയാൻ ശ്രമിക്കുക. ഇല്ലങ്കിൽ അതു നമ്മളെ തെറ്റിദ്ധാരണയിലേക്ക് നയിക്കും 

                             എന്ന് 

                             തൂലിക ✏️

 🌹 തിരിച്ചറിവ് 🌹 ഒരിക്കൽ കുറച്ചു വിനോദ യാത്രക്കാർ വഴിയോര കാഴ്ച്ച ആസ്വദിച്ചുകൊണ്ടിരിക്കുമ്പോളാണ് കുറച്ചു ആനക്കൂട്ടങ്ങളെയും പാപ്പനെയും ശ്രദ്...